مضطرب
مضطرب
نيازكار / كوكسال جنگيز
كيجەلرى غم طولار آی یرینە اوطەمە ،
آینەلر حزن ساغر ، درد یوماغی آدامه .
عمرمی یوقلییورم ، ضرر أوستنە ضرر .
قلمم صیفەلردە ییتیكلریمی آرار .
نیجە خاطرە صاقلار بینمڭ قیوریملری ،
منزلمە اوداقلر یوللرڭ آیریملری .
محنتلر برلشوب دە قدّمزی بوكركن .
دوزلیر خویرات نفسم ، ربمە دیز چوكركن ،
زنبرگی بوزولمش ، دونوب طورییور عالم ،
نرەیە باقسەم قهر ، نە یانە باقسەم الم .
قورولان محكمەدە بللی دگل كیم صانیق ؟
اوچ بچوق صویسز ایچون یوق اولییور انسانلق .
تیرانلر چیقار ایچون وحشی بر دوزن قورمش ،
صوڭ عصرڭ جلادلری مظلوم بویننی وورمش .
گوز یاشلری سیل اولمش تركستان ، فلسطیندە ،
ظلمە سیرجی قالمق وار میدر یوجە دیندە ؟
كشمیردە ، آراقاندە ایڭلییور دینداشمز ،
اسیر تورك یورتلرندە زهر اولدی آشمز .
نسلمی هدف آلمش ، گورونمەین مرمیلر ،
حریتمی چالمش ، وجدانسز حرامیلر .
حق ، حقوق ، عدالتڭ اسامەسی قالمامش ،
چكدیگی اضطرابدن جهان حضور بولمامش .
دگرلر آلت أوست اولمش ، عیاری یوق میزانڭ ،
باغریڭە خائن طولمش ، شانلە تاریخ یازانڭ .
باغمزدە تالان وار ، بلبل زار ادیب طورور ،
گلستاندە غنجەلر داها آچمەدن قورور .
سودا توزلی رافلردە ، جانلر جاناندن عراق ،
جاندن سون قالدی می ؟ انسان ایدییور مراق .
گوڭل هجرانلە محزون ، سینەدە بیڭ بر یارا ،
نیازكار سحر وقتی دوام ایت نیازلرە .